வெடிகுண்டுகளுடன் பதுங்கியிருந்த 2 ரவுடிகள் கைதுகார், கத்திகள் பறிமுதல்
புதுச்சேரிஎதிரிகளை கொலை செய்யும் நோக்கில் வேல்ராம்பட்டு ஏரிக்கரையில் நாட்டு வெடிகுண்டுகளுடன் பதுங்கியிருந்த 2 ரவுடிகளை போலீசார் கைது செய்தனர். அவர்களிடம் இருந்து கார், கத்திகள் பறிமுதல் செய்யப்பட்டன. 2 ரவுடிகள் கைது புதுச்சேரி வேல்ராம்பட்டு ஏரிக்கரையில் ரவுடிகள் பதுங்கி இருப்பதாக போலீசாருக்கு ரகசிய தகவல் கிடைத்தது. உடனே போலீஸ் சூப்பிரண்டு லோகேஷ்வரன் உத்தரவின் பேரில் முதலியார்பேட்டை போலீஸ் இன்ஸ்பெக்டர் சுரேஷ்பாபு, சப்&இன்ஸ்பெக்டர் இளவரசன் மற்றும் போலீசார் சம்பவ இடத்திற்கு விரைந்து சென்றனர்.
போலீசார் வருவதை அறிந்த உடன் அவர்கள் அங்கிருந்து தப்பி ஓட முயன்றனர். உடனே போலீசார் அவர்களை விரட்டி பிடித்தனர். அவர்களிடம் நடத்திய விசாரணையில், நைனார்மண்டபத்தை சேர்ந்த வினோத்குமார் (வயது 32), வாணரப்பேட்டை எல்லையம்மன் கோவில் தெருவை சேர்ந்த திலிப் (32) என்பது தெரியவந்தது.பின்னர் போலீசார் அவர்கள் வந்த காரை சோதனை நடத்தினர். அப்போது அதில் 2 நாட்டு வெடிகுண்டுகள் மற்றும் அரிவாள்கள் பதுக்கி வைத்திருப்பது தெரியவந்தது.
அதனை பறிமுதல் செய்த போலீசார், அவர்கள் 2 பேரையும் முதலியார்பேட்டை போலீஸ் நிலையத்திற்கு கொண்டு வந்து விசாரணை நடத்தினர். கொலை செய்யும் நோக்கில்… விசாரணையில், அவர்கள் 2 பேரும் கடந்த ஆகஸ்டு மாதம் 5ந் தேதி புதுச்சேரி 100 அடி ரோட்டில் ஜான்பால் நகரில் உள்ள ஒரு மனமகிழ்மன்றத்துக்குள் அத்துமீறி நுழைந்து அங்கு இருந்தவர்களை கத்தியை காட்டி மிரட்டி பணத்தை பறித்து சென்ற வழக்கில் தொடர்புடையவர்கள் என்பது தெரியவந்தது.
மேலும் கொலை செய்யப்பட்ட முத்தியால்பேட்டையை சேர்ந்த அன்புரஜினியின் ஆதரவாளர்களான இவர்கள் அவரது கொலை வழக்கில் தொடர்புடைய எதிரிகளை பழிக்கு பழியாக கொலை செய்யும் நோக்கில் பதுங்கி இருந்தது தெரியவந்தது. உடனே போலீசார் அவர்கள் 2 பேரையும் நீதிபதி முன்னிலையில் ஆஜர்படுத்தி காலாப்பட்டு மத்திய சிறையில் அடைத்தனர்.
